បន្ទាយមានជ័យ៖ សមត្ថកិច្ចឃាត់ជនសង្ស័យចំនួន០៥នាក់ ក្នុងចំណោមបក្សពួកប្រមាណ១០នាក់ បញ្ជូនទៅស្នងការនគរបាល ខេត្តបន្ទាយមានជ័យ អនុវត្តតាមនីតិវិធី នៅរសៀលថ្ងៃទី១៨ ខែមករា ឆ្នាំ២០២២ ក្រោយធ្វើសកម្មភាពយកដុំថ្ម និងកាំបិតគប់ទៅលើជនរងគ្រោះចំនួន០៤នាក់ បណ្តាលឲ្យជនរងគ្រោះម្នាក់រងរបួសធ្ងន់ និងបានស្លាប់ពេលបញ្ជូនទៅសង្គ្រោះនៅមន្ទីរពេទ្យបង្អែកខេត្តមិត្តភាពកម្ពុជា-ជប៉ុន ស្រុកមង្គលបូរី ខេត្តបន្ទាយមានជ័យ។

អធិការនគរបាល ក្រុងប៉ោយប៉ែត លោកវរសេនីយ៍ឯក សៅ សារឿន បានឲ្យដឹងថាកាលពីវេលាម៉ោង១១និង៣០នាទីយប់ថ្ងៃទី១៦ ខែមករា ឆ្នាំ២០២២ មានអំពើហឹង្សាមួយកើតឡើង បង្កដោយក្រុមជនសង្ស័យប្រមាណជា១០នាក់ ម៉ូតូ០៦គ្រឿង បានធ្វើសកម្មភាពគប់និងចាក់ទៅលើជនរងគ្រោះ ចំនួន០៤នាក់ នៅចំណុចភូមិសុខសាន្ត សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ ដែលបណ្ដាលឱ្យជនរងគ្រោះម្នាក់ត្រូវកាំបិតចំពោះធ្លាយចេញពោះវៀន និងបានស្លាប់ក្រោយពីបញ្ជូនដល់មន្ទីរពេទ្យបង្អែកខេត្តមិត្តភាពកម្ពុជា-ជប៉ុន។

ក្រោយហេតុការណ៍នេះសមត្ថកិច្ចបានតាមចាប់ខ្លួនជនសង្ស័យជាបន្តបន្ទាប់ ដោយនៅពេលនេះចាប់បាន៥នាក់ហើយដែលរួមមានឈ្មោះ តិ អ៊ីន ភេទប្រុស អាយុ២៦ឆ្នាំ ឈ្មោះ ពាន សុផាន់ណា ភេទប្រុស អាយុ២២ឆ្នាំ ឈ្មោះធុច ឆាត ភេទ ប្រុស អាយុ១៨ឆ្នាំ ឈ្មោះតាក់ ដារ៉ា ភេទប្រុស អាយុ១៧ឆ្នាំ និងឈ្មោះឡឹក សាវុធ ហៅក្រៅ ប៉ិឡិ ភេទប្រុស អាយុ១៩ឆ្នាំ។

ស្នងការនគរបាលខេត្តបន្ទាយមានជ័យលោក សិទ្ធិ ឡោះ បានបញ្ជាក់ថានៅពេលនេះសមត្ថកិច្ចកំពុងស្រាវជ្រាវរកជនបក្សពួកជនសង្ស័យទាំងនេះបន្តទៀត៕